يدري بحالي.. " حطني .. تلقاني !! "

النوم له كم من شهر ما جاني
والهم من كثر العنا.. همـيته

بأسباب من عقب اللقا .. خـلاني
مالي حد غير الفراق ا لقيـته

الفكر يمه .. جابني ووداني
ما عنـه يتخلـى و لو خلــيته

من دونه.. احيا .. والبشر تنعاني
وكل من ضحك لي ؟.. فـي انا عزيتـه

قبل اعرفه .. كم كان ليلي هاني
ان كان جاني نوم والا جيــته .. .
.
ذي دعوتي: " يارب لا تبلاني !...
... بالحب ".. مير ان البلا حبيته

كان ا يتشكى عيشته وحداني
وانا .. على نيـــاتي وحييـته !

شفته حزيـــن .. وكان يترجاني
ياليتني من يومـــــــها رديــتــه

لا جا يسولف لي .. يضيع لساني !
وانسى كلامي وين انا حطيــتــه

حتى سكوته يستفز ألحاني
على مقامات الغـــلا غنيته

يضحك ؟.. ولا اذكر عقبها عنواني !
يرفع حجاجه ؟.. وانشده عن بيته

به طيبة تشبه بياض ألواني
وله هيبة ما تشبه الا صيته

واموووت به لاقام يتحداني !
ويموت بــي لا قمت وتحديـــته

يدري بحالي.. " حطني .. تلقاني !! "
وش كان ماكان الطلب لـبـيتـه

وبين الرجاجيل ان طرى لي ثاني ؟
ما اعده الا ( بنت ) .. لو عديتـــه !

ولا قد ملى عيـــنه سوى قيفاني
رغم انني بالشعر ما وفـــيــتـه

من بن سبيـل / لينما / الجزلاني
محد وصف حـس معه حسـيته !

ورغم انني " رمز الوفا الإنساني"
خليت لجله كل من أغليته !!!

وانا اشهد انه من نوى يهواني
يتعب .. مـ غيره: متعبي .. سمـيــته

متمكن مني و من وجداني
ليته درى عن حالتــي يا ليته

صحيح بــإنه عمري و خـلاني
مير ان طرت له " ثانية " .. وريـــته !

وان فكــر فـ غيبــتـــه يتناساني ؟؟
ما ينفعه لا جا .. وانا ناسيـــته